شاعر پر تبصرہ : مرزا اسد اللہ خان غالب ؔ ( آفاقی شاعر )
؎ ہیں اور بھی دنیا میں سخن ور بہت اچھے
کہتے ہیں کہ غالب ؔ کا ہے انداز ِ بیاں اور
غالب ؔ بلا شبہ اردو کے ان شاعروں میں سے ہیں جو اپنی فکر اور اپنے انداز کلام سے اردو غزل کا معیار ٹھہرے ۔
حرف ِ آغاز
غالب ؔ نے اردو غزل میں ایک نیا ذہن پایا ۔ آپ نے اردو غزل کی آبرو بڑھا دی ۔ غالب ؔ کے فن کی عظمتو ں پر نہ صرف بر صغیر بلکہ مغربی یونیور سٹیوں میں بھی تحقیق و تصنیف کا کام جاری ہے ۔
حالات ِ زندگی
مرزا غالب ؔ 1797 ء میں آگرہ میں پیدا ہوئے ۔ اصل نام ” اسد اللہ خان ” ، لقب ” مرزانوشہ ” ، شاہی دربار سے ” نجم الدولہ اور نظام جنگ ” کا خطاب عطا ہوا ۔ پہلے ” اسد ” تخلص کرتے تھے ۔ بعد میں غالب ؔ تخلص کیا ۔
آپ کا سلسلہ نسب ایرانی بادشاہوں سے ملتا ہے ۔اپنے دادا شاہ عالم کے زمانے میں دہلی پہنچے ، جاگیر پائی ، مگر انگریزوں کے زمانے میں جاگیر ضبط ہو گئی ۔ غالب ؔ کی تمام زندگی حادثات میں گزری ۔ شاعری کا شوق بچپن سے تھا ۔ پہلے فارسی اور پھر اردو میں شعر کہے ۔ فارسی اور اردو کے دیوان اُن کی یاد گار ہیں ۔ 1869 ء میں دہلی میں وفات پائی ۔ وہیں جامع مسجد کے نزدیک ان کا مزار ہے
کلام کی خصوصیات
غالبؔ کی شاعری جدّت ِ بیان ، اچھوتے انداز ، نئے مضامین دشوار پسندی ، ایجاز و اختصار ، رمز و ایما ء ، فلسفیانہ نکات اور
انسانی نفسیات کی ترجمان ہے ۔
1۔ سوز و گداز : غالب کا کلام سوز و گداز سے لبریز ہے ۔ مالی تنگ دستی کے باوجود ان کے کلام میں غم ِ جاناں اور غم ِ دوراں کا نہایت پُر سوز اظہار ہے ۔
؎ زندگی اپنی کچھ اس شکل سے گزری غالبؔ ہم بھی کیا یاد کریں گے کہ خدا رکھتے تھے
2۔ سہل پسندی : غالب ؔ کے کلام کی ایک خوبی سہل پسندی بھی ہے ۔مشکل اور دقیق نظرئے کو وہ آسانی سے بیان کردیتے تھے ۔
؎ مرتے ہیں آرزو میں مرنے کی موت آتی ہے پر نہیں آتی
3 ۔ رندی : غالب ؔ کے کلام میں اکثر شراب کا ذکر نظر آتا ہے ۔وہ اس کا ذکر ایک منفرد انداز سے کرتے ہیں ۔
؎ کعبہ کس منہ سے جاؤ گے غالبؔ شرم تم کو مگر نہیں آتی
؎ زاہد شراب پینے دے مسجد میں بیٹھ کے یا وہ جگہ بتا دے جہاں پر خدا نہ ہو
4۔ ایجاز و اختصا ر : طویل موضوع کو مختصر اور پر اثر انداز بیان کہنے کا فن غالب ؔ کا کمال تھا ۔
؎ یہ نہ تھی ہماری قسمت کہ وصال ِ یار ہوتا اگر اور جیتے رہتے یہی انتظار ہوتا
؎ ہم بھی منہ میں زبان رکھتے ہیں کاش پوچھو کہ مدعا کیا ہے
؎ ہم ہیں مشتاق اور وہ بے زار یا الٰہی ! یہ ماجرا کیا ہے
5 ۔ واردات ِ عشق: غالب ؔ کا کلام واردات ِ حسن و عشق کا گراں قدر سرمایہ ہے ۔ انہوں نے روایتی عشق سے
دامن بچاتے ہوئے ایک معیار قائم کیا ۔وہ عشق میں خود داری اور خود شناسی کے مبلغ ہیں ۔
؎ عشق میں طبیعت نے زیست کا مزہ پایا درد کی دوا پائی ، درد لا دوا پایا
؎ عشق نے غالب ؔ نکمّا کر دیا ورنہ ہم بھی آدمی تھے کام کے
؎ عشق پر زور نہیں ہے یہ وہ آتش غالبؔ کہ لگائے نہ لگے اور بجھائے نہ بجھے
؎ وہ کہہ کے چلے ، اتنی ملاقات بہت ہے میں نے کہا رک جاؤ ، ابھی رات بہت ہے
6 ۔ جدّت ِ بیان : غالب ؔ نے اردو غزل میں ایک نیا ذہن پایا ۔ایسے ایسے مضامین کہے جس نے اردو غزل کی آبرو بڑھا ئی اور اگر پرانے مضمون کو غزل میں جگہ دی تو ایک نئے انداز کے ساتھ ۔
؎ ہے آدمی بجائے خود اِک محشر ِ خیال ہم انجمن سمجھتے ہیں ، خلوت ہی کیوں نہ ہو
؎ نکلنا خُلد سے آدم کا سنتے آئے ہیں لیکن بڑے بے آبرو ہوکر ترے کوچے سے ہم نکلے
7 ۔ شوخی و ظرافت : غالب کا ایک خاص کمال یہ بھی ہے کہ تصوّف ، فلسفہ اور باوقار عشقیہ مضامین کے ساتھان کے کلام میں شوخی اور ظرافت کا رنگ بھی ملتا ہے ۔اسی بِنا پر مولانا حالی ؔ نے انہیں ” حیوانِ ظریف بھی کہا ہے ۔
؎ پکڑے جاتے ہیں فرشتوں کے لکھے پر نا حق آدمی کوئی ہمارا دم ِ تحریر بھی تھا
8 ۔ دشوار پسندی : جہاں غالب ؔ نے اپنے کلام میں سہل پسندی سے کام لیا ؛ وہیں کہیں کہیں دشوار پسندی سے بھی کام لیا ہے ۔
؎ دام ِ ہر موج میں ہے حلقۂ صد کام نہنگ دیکھیں کیا گزرے ہے قطرے پہ گُہر ہونے تک
9 ۔ اچھوتا اور منفرد انداز : غالبؔ نے اپنے کلام میں ہمیشہ ایک منفرد انداز کو اختیار کرنے میں ترجیح دی ۔وہ عام روش سے ہٹ کر چلتے تھے ۔جو سب سے جداگانہ اور منفرد ہوتا تھا ۔
؎ کوئی مرے دل سے پوچھے ترے تیر ِ نیم کش کو یہ خلش کہاں سے ہوتی جو جگر کے پار ہوتا
؎ دکھ دے کر سوال کرتے ہو تم بھی غالبؔ کمال کرتے ہو
مرنا چاہیں تو مر نہیں سکتے تم بھی جینا محال کرتے ہو
اب میں کس کس کی دوں مثال تمھیں ہر ستم بے مثال کرتے ہو
10 ۔ عشق مجازی کی ترجمانی : غالب کا عشق فطرت انسانی کی ضرورت نظر آتا ہے کہ اسی کے تعلق سے زندگی میں رنگ نظر آتا ہے ۔
؎ تری نازکی سے جانا کہ بندھا تھا عہد بودا کبھی تُو نہ توڑ سکتا اگر استوار ہوتا
؎ اُن کے دیکھے سے جو آ جاتی ہے منہ پر رونق وہ سمجھتے ہیں کہ بیمار کا حال اچھا ہے
11 ۔ فلسفۂ حیات : غالبؔ نے اردو غزل میں فلسفے کے مسائل اور فلسفۂ حیات کو موضوع بنایا ۔یہ ایک دشوار کام تھا ۔ مگر غالبؔ نے شعری نزاکتوں کا خیال رکھتے ہوئے نہایت اچھوتی باتیں کہیں ۔
؎ غم اگرچہ جاں گُسل ہے ، پہ کہاں بچیں کہ دل ہے غمِ عشق گر نہ ہوتا ، غمِ روزگار ہوتا
؎ قید ِ حیات و بندِ غم ، اصل میں دونوں ایک ہیں موت سے پہلے آدمی غم سے نجات پائے کیوں
12 ۔ ازلی حقیقتوں کی نقاب کشائی : غالب ؔ نے اپنی غزلوں میں ازلی حقیقتوں کی نقاب کشائی کی ہے ۔اپنے مشاہدات کی گہرائی و گیرائی کی بدولت انہوں نے لازوال اشعار کہے ۔
؎ رگ ِ سنگ سے ٹپکتا وہ لہو کہ پھر نہ تھمتا جسے غم سمجھ رہے ہو اگر اِک شرار ہوتا
13 ۔ تصوّف : حکمت و تصوّف کے مسائل کو غزل میں شامل کر کے غالب ؔ نے اردو غزل کو باوقار انداز دیا ۔
؎ اُسے کون دیکھ سکتا کہ یگانہ ہے وہ یکتا جو دُوئی کی بُو بھی ہوتی تو کہیں دوچار ہوتا
14 ۔ نئی تراکیب کا استعمال : نئی تراکیب اور نئے الفاظ کے ساتھ اردو غزل کو نئی شان عطا کرنا غالب ؔ کی اہم خوبی ہے ۔اپنے جذبات و خیالات کے اظہار کے لئے انہوں نے نئی تراکیب وضع کیں ۔نئے الفاظ تلاش کئے ۔یوں اردو غزل کی دلکشی اور جاذبیت میں اضافہ کیا ۔
؎ نقش فریادی ہے کس کی شوخئ تحریر کا کاغذی ہے پیرہن ہر پیکر ِ تصویر کا
15 ۔ صنائع و بدائع کا استعمال : غا لبؔ کے ہاں صنائع و بدائع کا استعمال بھی ایک منفرد انداز سے نظر آتا ہے ۔ یہ فکر ِ انسانی کو حرکت دینے کا سبب بنتے ہیں ۔یہ کوئی پیچیدگی پیدا نہیں کرتے بلکہ ان میں مقصدیت نمایاں نظر آتی ہے ۔
؎ یوسفؑ اس کو کہوں اور کچھ نہ کہے خیر ہوئی گر بگڑ بیٹھے تو میں لائق ِ تعزیر بھی تھا
16 ۔ فلسفیانہ انداز : اپنے کلام میں غالب ؔ نے شعری نزاکتوں کا التزام رکھتے ہوئے ایسی اچھوتی اور فلسفیانہ بات بھی کہی جو ان ہی کا حصہ ٹھہریں ۔
؎ نہ تھا کچھ تو خدا تھا ، کچھ نہ ہوتا تو خدا ہوتا ڈبویا مجھ کو ہونے نے ، نہ میں ہوتا تو کیا ہوتا
17 ۔ آفاقیت : غالب ؔ کے کلام میں آفاقیت پائی جاتی ہے ۔یہی سبب ہے کہ ان کو آفاقی شاعر کہا جاتا ہے ۔
؎ بس کہ دشوار ہے ہر کام کا آساں ہونا آدمی کو بھی میسر نہیں انساں ہونا
18 ۔ حقیقت پسندی : غالب ؔ کا کلام حقیقت پسندی کا مظہر ہے ۔انہوں نے بڑے مؤ ثر انداز میں دنیا کی حقیقتوں کو بیا ن کیا ہے ۔
؎ بازیچۂ اطفال ہے دنیا مرے آگے ہوتے ہیں شب و روز تماشا مرے آگے
19 ۔ دوسرے شعراء کا احترام : غالب ؔ اپنے کلام کے مقام اور اہمیت سے اچھی طرح واقف تھے وہ جانتے تھے کہ آپ کا کلام کس مقام اور حیثیت کا حامل ہے ۔وہ خود کہتے ہیں
؎ ہیں اور بھی دنیا میں سخن ور بہت اچھے کہتے ہیں کہ غالب ؔ کا ہے انداز ِ بیاں اور
لیکن اس کے باوجود وہ دوسرے شعراء کی عظمت کا اعتراف بھی کرتے ہیں۔
؎ ریختہ کے تمہی استاد نہیں ہو غالبؔ کہتے ہیں اگلے زمانے میں کوئی میرؔ بھی تھا
20 ۔ محا ورہ بندی : دیگر شاعرانہ خوبیوں کے ساتھ ساتھ غالب ؔ کے کلام کی ایک دلکش خوبی محاورہ بندی بھی ہے ۔
؎ رونے سے اور عشق میں بے باک ہو گئے دھوئے گئے ہم ایسے کہ بس پاک ہو گئے
21 ۔ جداگانہ طرز : غالب ؔ کی روش سب سے ہٹ کر تھی ۔ان کا انداز جداگانہ تھا ۔وہ ہر بات ایک نئے اور دلکش انداز سے بیان کرتے تھے ۔
؎ بے خودی بے سبب نہیں غالبؔ کچھ تو ہے جس کی پردہ داری ہے
؎ آتے ہیں یاد حسرت ِ دل کے شمار داغ مجھ سے مرے گناہ کا حساب اے خدا نہ مانگ
؎ نکلنا خُلد سے آدم کا سنتے آئے ہیں لیکن بڑے بے آبرو ہوکر ترے کوچے سے ہم نکلے
نقادوں کی آراء
1۔ علامہ نیاز فتح پوری غالب ؔ کے بارے میں لکھتے ہیں کہ
” جب تک دنیا میں اردو شاعری کا چرچا رہے گا لوگ نئے نئے عنوانات کے نام سے غالبؔ کے کلام کا مطالعہ کرتے رہیں گے ، ”
2 ۔ پروفیسر رشید احمد صدیقی کے بقول :-
” وہ اردو شاعری کی تنہا آواز ثابت ہوئے ۔ ”
تبصرہ / حرف ِ آخر
غالب ؔ اپنی شاعرانہ خصوصیات کے ساتھ اردو غزل کی ایسی با کمال شخصیت بن کر ابھرے کہ اس صنف کو معراج بخشی ۔ان کی فکری شاعری نے قدرت کی طرف سے جو جاذبیت ، کشش اور رعنائی پائی ؛ وہ کسی حال میں کم نہ ہو سکی ۔ غالب ؔ بلا شبہ اردو کے ان شاعروں میں سے ہیں جو اپنی فکر اور اندز ِ کلام سے اردو غزل کا معیار ٹھہرے ۔
( تیار کردہ : شاکرہ کاظمی )
٭۔۔۔۔۔۔۔۔۔۔٭۔۔۔۔۔۔۔۔۔۔۔٭