غزل ۔ میر دردؔ
تعارف شاعر: (۱۷۲۱۔۱۷۸۵)
- آگرہ میں پیدا ہوئے۔
- آپ مشہور صوفی شاعر تھے۔
- آپ کا سلسلہ نسب خواجہ بہأ الدین نقشبندی سے ملتا ہے اور والدہ کی طرف سےحضرت عبدالقادر جیلانی غوث الاعظم تک جا پہنچتا ہے۔
- آپ نے اپنی شاعری میں تسلیم و رضا اور عظمتِ انسانی جیسےمضامین کو بڑی خوبصورتی سے باندھا ہے۔
- ان کے کلام میں سوز اور روانی ہے۔
- غزل کو گل و بلبل کی روایت سے نکال کرعرفان و تصوف کی پاکیزگی سےہم کنار کیا۔
- آپ کی غزلوں کا مقصد کائنات اور خالقِ کائنات کے تعلق کو سمجھانا اوراسی کی روشنی میں زندگی گزارنے کا ڈھنگ سکھانا ہے
شعر نمبر 1 : ہم تجھ سے کس ہوس کی فلک جستجو کریں دل ہی نہیں رہا ہے جو کچھ آرزو کریں
حل لغت: ہَوَس: خواہش، فلک: آسمان بمعنی تقدیر
مفہو م : مسلسل پریشانیوں کے باعث ہمارا دل بجھ گیا ہے۔
وضاحت : بقولِ شاعرہم نے ساری زندگی اس قدر پریشانیوں اور مصیبتوں کا سامنا کیا ہے کہ اب دل بجھ کر رہ گیا ہے اور کوئی خواہش یا تمنا جنم نہیں لیتی۔ یوں محسوس ہوتا ہے کہ سینے میں دل ہی نہیں رہا کہ کوئی آرزو پیدا ہو۔
مماثل شعر : ؎ کچھ راز نہیں کھلتا دز دیدہ نگاہی کا ا ب تو مرے سینے میں دل ہے نہ تمنا ہے
فنی محاسن : استعارہ(فلک: آسمان) بمعنی زمانہ یا تقدیر،
محاورہ( دل ہی نہیں رہا :خواہش کا پیدا نہ ہونا)
بقیہ اشعار کے مفاہیم اور مماثل اشعار
مفاہیم :
۲۔ ہمارے اللہ ہو کے نعرے سے ماسوا کے تمام مظاہر مٹ جائیں۔
۳۔ ہم وہ گنہ گار ہیں جن کے دامن کو فرشتے بھی مقدس سمجھتے ہیں۔
۴۔ ہم شمع کی مانند جلتے ہیں پر لب کشائی کی تاب نہیں رکھتے۔
۵۔ میں صاف دل ہونے کے باوضود لوگوں کے لئے قابلِ قبول نہیں ہوں۔
۶۔ فانی دنیا کے تکلفات کی آرزو کرنا بے کار ہے۔
۷۔ اہلِ ظاہر زاہدوں کو معرفتِ الٰہی سے سیراب ہونا چاہیئے۔
مماثل اشعار :
؎ کثرت میں ہوگیا ہے وحدت کا راز مخفی جگنو میں جو چمک ہے ، وہ پھول میں مہک ہے
؎ موتی سمجھ کے شانِ کریمی نے چن لیے قطرے جو تھے مرے عرقِ انفعال کے
؎ ہے کچھ ایسی ہی بات کہ چپ ہوں ورنہ کیا بات کر نہیں آتی
؎ دِکھا دوں گا جہاں کو جو مری آنکھوں نے دیکھا ہے تجھے بھی صورتِ آئینہ حیراں کر کے چھوڑوں گا
؎ کس سے پیمانِ وفا باندھ رہی ہے بلبل کل نہ پہچان سکے گی گلِ تر کی صورت
؎ نہ تخت و تاج میں، نے لشکرِ سپاہ میں ہے جو بات مردِ قلندر کی بارگاہ میں ہے
(مرتب کردہ :شاکرہ کاظمی )