شعری اصطلاحات اور ہیئت
مصرع : شعر کی ایک سطر یا بحر مصرع کہلاتی ہے ۔ایک شعر میں دو مصرعے ہوتے ہیں ۔ پہلے مصرعے کو مصرعۂ اولیٰ اور دوسرے مصرعے کو مصرعۂ ثانی کہتے ہیں ۔
شعر : موضوع اور مقفیٰ کلام کو شعر کہتے ہیں ۔ یہ مقررہ اوزان اور بحروں میں لکھا جاتا ہے ۔یہ دو شعروں پر مشتمل ہوتا ہے ۔ پہلے کو مصرعۂ اولیٰ اور دوسرے کو مصرعۂ ثانی کہتے ہیں ۔ اس میں ردیف قافیہ کی پابندی کی جاتی ہے ۔
بند / قطعہ : دو اشعار یا چار مصرعوں کا مجموعہ بند کہلاتا ہے ۔جبکہ قطعہ میں اشعار کی تعداد متعین نہیں ہوتی ۔ بند میں ایک پورا مفہوم ادا ہو جاتا ہے ۔ یہ ہر موضوع پر لکھے جاسکتے ہیں ۔ نظم بھی بند کی صورت میں لکھی جا سکتی ہے ۔
مسمّط : مسمّط اس نظم کو کہتے ہیں جس میں اوّل چند اشعار ایک قافیے میں لکھے جائیں ؛ اور اس کو ایک بند قرار دیا جائے ۔ اس کے بعد ہر بند کے اشعار جداگانہ قافیوں میں لکھے جائیں ۔
مسمّط کی ا قسا م :
مثلث : مثلث اس نظم کو کہتے ہیں جس کا ہر بند تین مصرعوں سے مرکب ہو ۔ پہلے بند کے تینوں مصرعے اور باقی بند کا آخری مصرعہ ہم قافیہ ہوتا ہے ۔
مربع : دو اشعار یا چار مصرعوں پر مشتمل مربع کہلاتا ہے ۔ اسے بند یا قطعہ بھی کہتے ہیں ۔ کچھ نظمیں ایسی بھی ہوتی ہیں جن کا ہر بند چار مصرعوں کا ہوتا ہے ۔
مخمس : ا یسی نظم جس کے ہر بند میں پانچ پانچ مصرعے ہو اس کو مخمس یا خمسہ بھی کہتے ہیں ۔
مسدس : ایسی نظم جس کے ہر بند میں چھ چھ مصرعے ہوں ۔اس میں چار مصرعے ایک قافیہ میں لکھے جاتے ہیں ۔ اور دو مصرعے الگ قافیے میں لکھے جاتے ہیں ۔ مرثیے عام طور پر مسدس ہی میں لکھے جاتے ہیں ۔
مسبع : ایسی نظم جس کے ہر بند میں سات مصرعے ہوں ؛ اسے مسبع کہتے ہیں ۔
مثمن : وہ نظم جس کے ہر بند میں آٹھ آٹھ مصرعے ہوں ؛ اسے مثمن کہتے ہیں ۔
متسع : یہ وہ نظم ہوتی ہے جس کے ہر بند میں نو نو مصرعے ہوتے ہیں ۔
معشر : وہ نظم جس کے ہر بند میں دس دس مصرعے ہوں ؛ اسے معشر کہتے ہیں ۔
ٹیپ کا مصرع یا شعر : مخمس میں پانچواں مصرع اور مسدس میں تیسرا شعر جس کا ردیف قافیہ باقی اشعار سے مختلف ہوتا ہے ؛ اسے ٹیپ کا مصرع یا شعر کہتے ہیں ۔
ترجیع بند : ایسی نظم جس میں ٹیپ کا مصرع یا شعر پوری نظم میں جوں کا توں دہرایا جائے ؛ اسے ترجیع بند کہتے ہیں ۔
ترکیب بند : ایسی نظم جس میں ٹیپ کا مصرع یا شعر ہر بند میں مختلف ہو ، اسے ترکیب بند کہتے ہیں ۔
( مرتب کنندہ : شاکرہ کاظمی )